揸電單車唔係一定要狂飆，或改到鬼殺咁嘈先至有型，肯花啲心機，同部車玩吓紋身、玩吓HeavyMetalfeel，一樣可以獨一無二有型到痹。好似今次介紹呢三位Chopper迷咁，其中一人更未有車牌就改車，佢哋將改車，寓於娛樂，得閒就幫自己架車整吓容，自己設草圖，由車頭改到車尾，搞到面目全目非，由設計、買零件，再到改裝都係自己一腳踢，想得出都改得到。
記者：黃婉冰
攝影：黃子偉
名媛出入Ball場怕撞衫，今次三位主角同樣好怕「撞車」，唔好誤會喎，應該係撞車款先啱，因此，三個人由玩車第一日就開始學埋砌車。「最初係自己設計，從外國訂零件俾人裝嵌，到現階段係最高境界，自己設計兼自己裝嵌，鍾意點砌就點砌，為嘅都係可以隨心所欲，整架有自己Style，又獨一無二嘅電單車！
癡心漢會員Rick 電單車變隱形戰機
認識阿Rick咁耐，每次見親佢架車都覺得有啲唔同，咦，佢今次玩得好有型喎，一問之下先知原來此車款概念來自隱形戰機，佢更打算換塊短沙板，再換埋個合金頭軨。
Rick太鍾意改車，成日幫架車玩變臉，搞到架車次次都唔同款。
同Alex一樣，Rick一開始就自己同幫架車度身設計各式各樣的配件。「我以前會由日本訂購配件，開始覺得好悶，咪自己設計囉，我都係睇書、睇碟學改裝，畫完幅設計圖再教車房做，近年開始由設計到裝嵌都係自己做。我會先度好尺寸，然後俾做鐵或做鋁舖頭切割，好多時啲鋼鐵師傅都唔知呢啲係咩，淨係跟住我個圖去做，然後由我自己組裝，耐唔耐都會有朋友或者客人會搵我哋幫手改裝，有興趣可以大家研究吓。」
即Check
YamahaDragstar400喪改位
癡心漢首領Alex 一人擁有十部車
未見Alex前，已知此人乃電單車狂迷，重聽聞佢有多架唔同型號、款式嘅電單車，人就得一個、手腳又只得一對，點揸得晒？原來當中有好多都係齋擺、純粹收藏，咁究竟你有幾多架電單車？「咦？我要諗諗。」經過幾分鐘盤算後，先知原來自己現時有十架，真係服咗你囉！
「我玩車玩咗12年，基本上有轆嘅我都好鍾意，記得十幾歲嗰陣，睇見星期二檔案訪問鴨寮街阿Paul，佢坐住朋友嗰部HarleySpriner，我一見鍾情，嗰一刻開始就愛上電單車喇，但我發覺原裝車個款好悶又好鈍，配咗雜廠零件重靚，後來，索性自己設計，睇得書多自然靈感多，就係咁，嗰幾年一路搵料一路改，現時我有四架拆咗件，打算將油缸翻新，再翻噴車身顏色，我諗都要幾年時間先搞得掂。下個禮拜會再多一架，係Suzuki的『隼』，呢架車未改已經可以去到300公里，全港只得6部。」
即Check
HarleyRoadKing喪改位
癡心漢會員馬騮 先改車後考牌
三人之中，雖然馬騮玩車年資最淺，只得3年，但講到改車，佢都唔輸蝕，馬騮瘋狂到未考車牌就先改車，無法，因為佢真真正正中咗Chopper毒。「我淨係鍾意玩Chopper，『啡呤』講求速度，揸Chopper嗰種自由感覺，其他車畀唔到我。未考到車牌，已經買咗架電單車，諗住考車牌前改咗佢，考到牌就可以即刻揸。我都係唔鍾意俾人改車，一來貴，而且自己改先可以改到自己想要嘅嘢，加上我以前做過車房，又成日睇雜誌學改車，所以我已經差唔多將所有錢同時間放晒落部車度，平均半年一小改，一年一大執，出車咁耐，前後大改過三次，每次都改到個樣唔同晒，每次一手痕我又會摷啲嘢出嚟改吓整吓。」
即Check
HondaMagna250喪改位
全港唯一BSA英軍電單車
除Harley外，Alex亦有唔少舊車，好似呢部英國BSA，1970年出廠，全港只得一部，Alex用二萬幾蚊買入，但保險費要$7,900，部車本身好有睇頭，Alex忠於原著，無做過任何改裝，只係早前借畀一位導演朋友拍戲，因劇情需要，將原本橄欖綠色嘅油缸同電鍍部份噴黑咗。
很多人有興趣知道汽車版的相片，是用哪些相機拍攝呢？
是日拍攝相機：NikonD200
