猜一種動物。謎面：滿身都是白色長毛，一雙又大又藍的圓眼睛，整天跳來跳去好活躍，主人發號施令時服從性達100%，同佢講「HandHand」佢就會好乖咁遞手，叫佢「Sit」立即坐低一秒都唔會遲，平時最愛的工作係幫主人看舖睇門口，見到陌生人行過重會大叫。
若然單憑謎面，你猜到以上的動物係一隻狗，絕對情有可原。不過唔好意思，謎底其實係一隻安哥拉白貓，正確一點應該係Katherine的愛貓之一：安哥拉王子。
記者：黃藹瑩 攝影：林栢鈞
登登登櫈……跳木圈表演出場啦！
兄妹有Fans
Katherine的家有兩隻愛貓，品種同樣是白色的安哥拉，但一隻是男一隻是女，一隻是買回來一隻是收養的；男的是哥哥叫Prince，女的是妹妹叫Princess；Prince有大將之風，Princess卻膽小如鼠。
早已聽過朋友講Katherine的兩隻安哥拉貓好精靈，尤其係哥哥Prince，似足一隻頑皮小狗，逗得Katherine餐廳內的客人開心滿足。Katherine重話有客人更加係專程來探望Prince，估唔到做貓的都居然有Fans，認真令人羨慕。
訓練牠似狗
一來到Katherine的餐廳門口，就已經見到頭戴藍絲帶的Prince目不轉睛坐正門口，恭迎小記同攝影師。Katherine話：「Prince平日最鍾意坐正門口做守衞，好似監視住出面的一舉一動，佢好似忘記咗自己係貓的身份，以為自己係隻狗。」
唔止會看門口呢個舉動似隻狗，Prince絕對唔似一般的貓兒只愛吃愛睡，活躍程度亦同小狗無異。Katherine話當初都冇想過要訓練Prince，以為貓同狗的性格根本南轅北轍，點知有日去寵物店買貓糧的時候，店內老闆娘同佢講貓一樣可以訓練，而最基本的條件一定要隻貓夠為食，Prince就正正有呢一個條件。
表演左右手
指令1：HandHand...RightHand！
Prince立即伸出右手畀主人，醒！
指令2：LeftHand！
Prince今次好似有點猶豫兼唔願意喎……Katherine惟
有再重複個Command，王子可能知道攝影正在進行中，為保面子，終於勉強伸出佢左邊的玉手！
出糧特訓
為食的Prince其實好奄尖，最愛的食糧係白灼蝦加紅白米飯，平時最愛的小食居然係乾瑤柱，認真識食！Katherine話唔知食蝦係咪會令貓精叻一點，每個動作只需訓練兩三次，Prince已經掌握得到，重好鬼醒目，相信佢本來（可能前世）應該係隻狗。
怕羞小妹
講咗咁耐，好似都重未同各位介紹Prince的妹妹Princess，呢隻樣貌極似迪士尼的卡通人物富貴貓Marie，唔單止怕羞，重好細膽。
Katherine話Princess同大哥Prince唔同，好怕人，原因相信同佢小時候俾主人拋棄有好大關係。「有日我發現有隻白色安哥拉瞓咗喺屋企門口，重以為係Prince，抱入屋先知係被人遺棄的Princess。」
牠來自土耳其
安哥拉貓源自土耳其，顏色主要為白色、紅色、黑色和褐色，一般來說白色的才是純種的安哥拉貓。Katherine呢對可愛的白色安哥拉貓其實屬「容易打理型」，一般比較早熟，又很有獨立性，不會整天黏着主人，而且聰明伶俐，難怪Prince可以好似小狗一樣做到各種指令。另外，咪以為佢哋成層厚厚的毛一定好難打理，咁就錯啦！原來厚毛只會喺冬天出現，夏天的時候，安哥拉貓就會脫毛，變成短毛貓一樣。
