四十四歲的白花油王子顏福偉近日再度活躍銀幕，跟鄧浩光一起拍攝的廣告，在電視、卡拉OK上不停播，廣告歌又打入勁歌金榜，他對此聲稱出到街「香港七成人都識我」。在訪問中，顏福偉又談及性取向，他自言有潔癖，連sex和kiss都驚。
對愛情煩厭
顏福偉雖然跟袁潔瑩和黎瑞恩傳過緋聞，但亦有傳聞指他不喜歡女人，他對此爽快地說：「好，我答你性取向呢個問題，無錯有好多男仔、女仔approach（接近）我，但呢排我對搵partner冇乜渴求，大部份時間都一個人。對愛情我有啲厭，係自己性格問題，成日覺得會厭，到時就唔知點甩，所以費事搞咁多嘢。
「況且我時間好full，你睇我好似好得閒，但其實私人嘢已經填滿晒，朝早起身坐一個鐘頭禪，跟住趕返公司，十二點幾又要游水，lunch後就返公司做嘢，放工通常會去做gym，然後返屋企食飯，跟住覆吓e-mail就十點幾嘞。」
拒用右手握手
顏福偉續說：「有時夜晚會去蒲，呢個亦係唯一我見朋友嘅時間，除非要帶客去，否則我唔鍾意去蘭桂坊。有人話我太孤芳自賞，我認㗎。我的確幾古怪㗎，又有潔癖，你都見啦，我不停要用消毒劑噴隻手，我𠵱家真係等緊老㗎，我連sex都驚、kiss都驚㗎，總之埋啲、距離近啲都驚。我知，我係有需要見心理醫生，我知我係有啲問題，握手就冇事，但我用左手同人握手，因為右手用嚟揸筷子食飯。我以前都有拍過拖，但嗰陣問題冇咁嚴重，𠵱家愈嚟愈嚴重。」
進軍立法會
一直覺得顏福偉醉心娛樂圈、醉心曝光率，但他說近五年已不太醉心娛樂圈，現時他反而想從政，做立法會議員。
撐全民普選
顏福偉說：「樂壇頒獎禮唔透明，你哋成日話要搞全民普選，搞歌曲普選就最公平，𠵱家樂壇就好似八百人選特首咁，我梗係支持全民普選啦，我考慮過做議員，有呢個打算，但冇興趣做區議員，立法會就有興趣，二○一二年可能會試，用功能組別嚟選。」
採訪：張止寒 攝影：何國豪 場地提供：花卉食坊
