浸會大學舊年七月要求啲教職員轉新約，以後薪酬水平要同市場掛鈎，唔再好似公務員咁，按年有級升有人工加。
大學全面引入商界做法，按表現發獎金究竟係咪適合好值得商榷，八方聽聞，校內有個別死硬派堅決反對，到咗噚日嘅最後限期，仍有六至八個教職員無簽名，佢哋不但拒絕轉新制，更諮詢緊法律意見，睇吓有冇得告校方。而明日教職員工會更準備舉行一個送行大會，哀悼浸大。
浸大校長吳清輝同校董會主席鄭慕智梗係唔想有咁嘅場面出現，所以喺最後關頭出盡法寶希望同事回心轉意。
班教職員咁大反應，除咗覺得士氣受挫、教學環境欠穩定之外，最反感係由市建局轉嚟做副校長嘅李兆銓，佢阿哥以收樓方式對付啲手無寸鐵嘅文人，威逼利誘都出齊。講到咁得人驚，唔知係班教授喺象牙塔住得太耐，抑或係李副校長出手太重？
爆料熱線：29290000、27860099
報料傳真：26239278
報料電郵：[email protected]