這是本地短線遊與食版的混合體，登多幾張風景相是一片苦心，望平時只顧打機看戲唱K消夜直落的你，能看多兩眼，感受那份久違了的郊遊樂；知你懶，故只敢推介你到山貝村放個風箏掟個靚Round吸番啖新鮮空氣，全程行行企企重有橫水渡搭，尾程鏟落元朗「茅屋」舒舒服服歎泰菜，唔好同我講辛苦，咁都嫌辛苦的話，你以後唔好出街，餐餐屈喺屋企捱公仔麵喇！
記者：盧家蕙
攝影：何家亮、周旭文
模特兒：Imageboy&girlfromSalvador
青山綠水Hea得過
西鐵元朗站起步至山貝村搭橫水渡，揮手，船家就會划艇埋岸，划過對岸唔使1分鐘（每位$5），叫船家划慢啲欣賞兩岸景色好似抵啲。登岸，見一條康莊大道，續依大路走，唔少MV、雜誌都嚟取景的小木橋終於出現，拍攝當日有唔少遊人排隊等影相。呢度啱晒野餐、放風箏、玩模型飛機，乜都唔想做，Hea吓吸啖新鮮空都係爽。
坐泰式茅屋開餐
入黑，肚仔餓，出番元朗市搵食，原路來原路走，返到西鐵元朗站，向博愛醫院行15分鐘，即見「泰屋」的大椰樹Logo霓虹招牌。泰屋的室外部份有兩大間泰式茅屋，內裏的粗糙木製椅桌、精緻雕花吊扇、燈籠及浪漫粉紅燭台，配石路上金光閃閃的燈泡、音律輕快的泰文歌，好異國風情。大家可主攻燒烤美食，超過20呎長海鮮檔有日本扇貝王、阿拉斯加大蟹腳、魔鬼魚、蟶子王、日本鯖魚等各地海鮮，全部即揀即燒，炭燒味香，正到爆！
食客有Say
泰屋（31470338）
地址：元朗坳頭東成里路1號新港酒店
營業時間：11:00am-11:00pm，周六、日及公眾假期至1:00am
交通：西鐵元朗站下車跟指示牌入山貝村，山貝村返回元朗站，依博愛醫院方向行15分鐘到達泰屋。
