回歸前嘅行政局，回歸後嘅行政會議，好似有兩項不成文規矩，第一條係集體負責制，第二條係集體保密制。前朝行政局議員李鵬飛到𠵱家先至偶然開口、公開講一啲行政局會議嘅無關重要逸事，真正重要決策過程，佢絕口不提。行政會議成員呢？唔知係唔係實行黨中央嘅集體民主制，唔少人有嘢講，呢方面就夠晒「民主」嘞。現在行政會議講乜，事先有人放風，行政會議決定如何，事後有人放料。放料之人顯然係有意放氣球，測試外間反應，至於乜嘢叫做保密制、負責制，就當係歷史陳迹，總之要放風，為當前政治服務。
好似賽馬稅制改革咁，行政會議有議員提出原則性反對，指改制會助長賭風，曾特首因此決定將有關法案發還畀民政事務局再議，咁嘅秘密料，記者知道晒喎，不如索性講明邊位行政會議成員有咁強嘅「原則性」與道德性啦，唔通佢唔知道改制之議，講咗成年幾，立法會開過各界聆訊會，大家傾到妥晒先至草擬法案，送上行政會議？
一啲人士滿口道德，誓要阻止所謂賭風蔓延，其志可嘉，不過經常針對馬會，就令馬迷覺得好無聊。香港係全世界最自由開放城市（講資訊啫），香港年輕人日日可以透過電腦接觸外地資訊，隔籬埠大張旗鼓宣傳新賭場度假酒店、漁人碼頭內設有吃角子機，唔通呢啲「賭風」香港人有力去阻止？連最正經嘅城市新加坡都開賭，招標興建賭場，李顯龍係一個道德人物，絕非花花公子，佢又唔怕新加坡人沾染上賭風？道德派議員送仔女去英國讀書，嘩，英國乜都有得賭，足球博彩店多過超市，想染上賭博，話咁易，請道德派唔好掩耳盜鈴咯，佢哋千祈唔好送子女留學英國。
教育子女不可沉迷賭博，絕對係父母嘅大責任，千祈唔好話係社會嘅責任，教師嘅職責。三字經講教不嚴，師之惰，我就話教不嚴係父之過，嚴嘅現代解釋應該包括埋理性分析。左丁山老竇自細就教仔賭馬賭狗，打天九，打麻雀，佢嘅道理就係「識咗唔易俾人呃，最緊要唔好沉迷。」奉勸啲道德派老友，帶十八歲仔女入馬場玩吓啦，孔子唔會鬧你嘅。