田北俊今日牛一，剛好五到尾，當然要好好慶祝，呢位自由黨主席平時keep得好fit，所以一啲都唔覺得佢已經做咗外公，重好快踏入花甲之年。田少一早定咗同一家大細坐船出海慶祝，連只有三個月大嘅外孫鄭晉都抱埋去湊高興。
天文台預告，呢幾日氣溫驟降，今日得攝氏十度，喺海上風更大，肯定凍兩三度，唔知個BB頂唔頂得順。不過，八方聽聞田少冇有怕，凍冰冰都照出海，夜晚就另有活動。至於生日願望，唔使多講，一定係快啲抱孫，乖仔啟文同媳婦梗係收到。
60歲退任黨主席
田少噚日接受商台訪問時都有講到自己生日，佢講：「好多朋友都想我到六十歲，因為想屈我幾支一九四七年嘅酒飲。」佢計劃六十歲後退下自由黨主席嘅位，重話做十年已夠晒，但會繼續做議員，因覺得現代人好長命，六十歲後退休無所事事，反而唔好。
今年中，係佢結婚三十五周年紀念，計劃大事慶祝。十年前嘅結婚周年，佢哋到半島包了一間餐廳，與百名親友慶祝。他話人生最大成就係娶咗呢位太太。田少重好坦言咁認有過幾位女朋友，至於幾多？佢講：「如果話我唔係好多，咪好失威？話太多，返去驚俾太太鬧。」話到自己咁風流，跟住佢又補飛，話自己係黨主席要檢點，有緋聞就唔好啦。
對於弟弟田北辰話父親比較錫佢（指田北辰），田北俊說，父母一般都較錫細嗰個，小時候兩兄弟搶玩具或蝦弟弟，「𠵱家梗係蝦唔到佢，隨時俾佢蝦番我轉頭。」他承認，弟弟讀書叻過自己；做事方面自己較急，田北辰就較慢，所以有人說話兩兄弟應溝勻啲。佢又強調，兩兄弟感情甚篤，唔係外界指嘅關係一般。佢重話介意人哋叫佢田少，唔通佢驚人撈亂佢哋兩兄弟？
爆料熱線：29290000、27860099
報料傳真：26239278
報料電郵：[email protected]