前晚Roadshow在會展舉行「至尊音樂頒獎禮2005」，劉德華奪三獎成大贏家，鄭中基開齋得男歌手獎，楊千嬅、何韻詩及容祖兒並列至尊女歌手，千嬅惟有玩枱布搶鏡。鄭中基得獎後高興地表示會看Twins尾場演唱會，而方力申也坦言已看了她們第二場的演出，大讚Twins有進步。
香港樂壇每年有四大頒獎禮，今年Roadshow也來湊熱鬧，前晚在會展舉行「至尊音樂頒獎禮2005」，共頒發四十一個獎項（詳見附表），缺席的劉德華得三獎成大贏家，包括兩個歌曲獎及至尊男歌手獎，男歌手獎得主還有古巨基，以及首次奪男歌手獎的鄭中基。至尊女歌手依然是多多是非的楊千嬅、容祖兒及何韻詩，千嬅完場祝酒時，站在男歌手一旁，沒與祖兒等並列，後來又獨自站前一排，玩弄香檳枱上的枱布，刻意搶鏡一番。
事先張揚去捧場
鄭中基表示今年有很多第一次，他說：「我第一次得男歌手獎，冇諗過囉，音樂上開好多齋。希望下年多啲好歌，同開演唱會。」Twins昨晚在紅館演出尾場演唱會，鄭中基事先張揚會去捧場，他說：「佢哋唔知我去，我自己買飛㗎。」
談到女友蔡卓妍（阿Sa）演出三角苦戀歌舞，似影射二人與千嬅之間的情事，鄭中基說：「舞台劇啫，故事內容冇樣中，話係寫照不如話你哋心照啦！」劇中男主角一腳踏兩船，是否暗示鄭中基？他即回應說：「咁梗係唔係。」再問鄭中基阿Sa可是做給他看？他說：「我都未睇，係都做畀你哋睇啦。」提到阿Sa聲沙，鄭中基說：「咁就要補一補。帶蜜糖畀佢？唔啦，佢話食咗封喉，我咪罪魁禍首，等佢自己食啲嘢調理吓就得啦。」
對於阿Sa的三角戀舞台劇，千嬅說：「我基本上係女演員，好易被套入一啲角色，大家敏感啫，娛樂新聞做點題啫，我唔執着，難得佢欣賞我首歌，故事要咁先好睇，一開始大團圓咪好快完？撐唔到五分鐘。」千嬅表示本想去看Twins的演唱會，但騰不出時間來，但已送了花籃去紅館打氣。問千嬅有否唱過阿Sa的歌，千嬅說：「我同方力申唱過《女校男生》。」
大讚歌藝有進步
方力申坦言已看了Twins的第二場演出，他說：「我入場同好多市民影相㖭，又唔係唔見得光，朋友做騷，得閒咪捧場囉，我冇入後台打招呼，想低調啲。支持朋友，唔想有其他新聞。我坐第四行，佢兩個都有同我打招呼。」問方力申有否感到鍾欣桐（阿嬌）很性感，方力申說：「呢啲唔講。」
方力申亦有讚Twins的歌藝進步。阿嬌與武師對打，問方力申可有擔心她受傷時，他說：「唔使擔心，一定做足安全措施嘅。」再問他怕不怕被指復合？方力申說：「就係唔想答太多，怕又有誤會發生。」
採訪：馬建華、胡比
攝影：仇志德
