今年港股頭威頭勢，4日升3.1%，梗係好開始，追入中銀香港（2388）與中航興業（1110），小勝添信心，今周再接再厲，留意鄭州燃氣（8099）與滙控（005），可望小勝變中贏。
中銀氣勢如虹，埋單升4%，但買埋C輪9068就發大財，由推介前0.495元升到0.88元，收0.86元，仍大升74%；二者兼買，提早過肥年。
大雞食細米 梗有理由
鄭州燃氣可食大茶飯，中期上望1.00元，長少少可睇1.30元，預期升幅39%與81%，好掂！
鄭州市為河南省省會，河南為中國第一大省，發展潛力優厚。鄭州燃氣受惠「西氣東輸」，獨家提供全市管道天然氣與罐裝液化氣，擴展步伐驚人，連阿拉伯聯合酋長國投資公司Emirates，富甲天下，都要入股分一杯羹，05年10月初以每股0.65元承購1億股H股，佔H股18.16%，佔總發行股本7.99%，大雞食細米唔合理，但如果呢粒米會膨脹數倍，就係另一個story！
第二大H股東係名牌基金Atlantis（西京投資），舵手據講來自渣打，佢揸得最重係威高（8199），持有17.01%，唔夠4個月，股價已大升89%，下一隻應輪到鄭州燃氣，睇好理由基本因素與概念並重。第一、05年度（12月年結）首3季多賺42.5%，預測全年可賺9800萬元人民幣，增50%，PE僅9.5倍，相對同業中國燃氣（384）與新奧燃氣（2688）預測PE分別係18倍與17倍，肯定大偏低。第二、曾爆響口有意申請由創業板轉去主板掛牌，短期㩒綠燈，提升形象後，一眾已入股基金包括大和與PartnersCapital在內，勢必加碼。第三、有意將20%內資股賣畀華潤石化，舊年年報曾提及，一旦成事，又有大刺激，雙方合作對盈利亦有幫助。
鄭州燃氣現價已逼近20天保歷加通道頂部，勢必破格而上，加上落後同業一條街，其爆發力不言而喻。
滙控起步走 睇134元
滙控上周五走勢靚絕，升1.00元，收127.70元，但升勢仍落後交行（3328）與建行（939），身為銀行股火車頭，冇理由失威，短期有十足條件挑戰上次高位134元，量度升幅4.9%，但正如上期分析中銀一樣，要兼買其C輪4907方為短炒之道。此輪收0.455元，3月尾到期，行使價123元，低水0.12%，槓桿率28.1倍，正股如果新春見134元，4907可見1.115元，升幅達148%！
高彰坡