考到車牌多年嘅鄭少秋，早幾日喺中環蘇豪區拍無綫新劇《非常大狀》外景，劇情講佢揸住部古董開篷跑車，載住向海嵐遊車河。點知秋官呢次竟然老貓燒鬚，搞唔掂部棍波車，結果成架車溜後，重差啲撞埋電燈柱度，嚇到向海嵐當堂面都青埋！
心情麻麻
當晚秋官打扮得西裝骨骨，同《非》劇一班演員包括唐寧、韓瑪莉、陳國邦齊集中環行人電梯附近對稿，而向海嵐因為喺呢場戲冇對白，所以行埋一邊玩手機SMS，之後又行咗去便利店買香口膠。現場見佢個樣木口木臉，似乎心情麻麻。
對完稿，秋官就同向海嵐坐上部掛咗個「T」牌（即臨時車牌）嘅古董開篷跑車，拍攝遊車河場面。唔知秋官係咪唔熟習揸棍波，所以試車嗰陣成架車突然溜後，車尾差啲撼埋電燈柱，嚇到向海嵐成個呆晒。
到正式拍攝嗰陣，秋官已經掌握到點揸棍波，結果一take過搞掂。事後秋官解釋話佢好少揸棍波，亦揸唔慣跑車，事關佢係穩陣派，鍾意揸舒適啲嘅房車喎！
