新進財經演員請食飯，講吓股票經。新進A最近頻頻曝光，算係新紮師兄。左丁山問佢點解經常寫或評論大公司，對小公司冇乜品題？介紹滙豐使乜你講呀，介紹隻毫子股而又可以升值幾倍嘅，就會一炮而紅啦。新進A話：「阿哥你有所不知，有啲蚊型股無風起浪，不宜評論，我試過一次叫人唔好沾手某某股，文章出街後就收到電話，話要關照我，街外錢一齊搵喎。嚇到我面青，以後費事嘞。呢呢，我叫人減持中電，沽售聯想，減持恒生等等，夠晒安全，大公司任鬧唔嬲，冇事嘅。」
寫股經啫，都有咁多限制，但現實如此，唔到你唔低頭，否則老闆會炒你魷魚。譬如話，鬧肥佬黎就百分之九十九冇事，佢老人家唔得閒告你，你鬧佢，佢當冇到。鬧第二個？小心啲喎，聽日就可能收到信。
左丁山好同情新進A，事業剛剛起步，無謂俾人打一棍。股票經紀想唱好，話咁易。美國曾經有個調查，發覺分析師多數唱好，唱淡嘅好快就唔見咗人，唱好嘅就襟撈好多。金融時報亞洲版（一月四日）有一篇專欄批評stockbrokereconomics（經紀佬經濟學），話經紀永遠都搵到一個唱好嘅理由。譬如經濟衰退，公司經營困難，經紀就會話利率看跌，利好大市；經濟暢旺，通脹重臨，利率看升嘅時候，經紀就話企業盈利增長強勁，預期PE（市盈率）便宜，利好大市，利率上升不足慮！
另一個竅妙係債券孳息比率（bondyieldratio），將債券孳息與股票派息比較，前者低後者高就買股票，反之就沽股買債券，據上述作者講，一九七七至一九九七，兩者有強烈關係，一九四八年至一九六八，毫無相關，利用歷史數據，任你噏，揀到一個有預測作用嘅時段，就有戲唱！資深財經演員識得其中奧妙，唱極都有。