今個06真係好年，繼1月1日有百幾人同年同月同日結婚後，AV界最近都搞咗個「聯婚」！講緊係國產老牌Shinco，推出首部行日本SHARP靚膽嘅32"LCDTV，可能搵到個靚老婆（應該係靚Panel先啱！），Shinco今次話明唔會好似以前「雷射頭事件」咁收收埋埋，重大大隻字寫晒出嚟！用料靚！機價又平咁多，係又怕乜認！
記者：朱崇德
攝影：陳偉強
ImageGirl：Irene
鳴謝：滿清皇朝（27814998）
講到國產LCDTV「買膽」砌機，其實係一件好平常嘅事；據行內人表示，國內的生產線其實重停留在17”-19”的電腦用LCD技術，須知現時香港LCDTV主流在32”或以上，為了機件的成熟度，技術及成本等問題，買Panel砌機，真係隨時來得更化算！
色調柔和 睇電視最強
講到買膽砌機，主流Panel有三大出產地；中上之選有韓國膽、次之有台灣，不過講到最靚嘅，仍然以日本膽較靚。其實Shinco的LCDTV一直以買韓國膽為主，今次係首度用上日本機王──SHARP靚膽，真係份外有睇頭。
初玩呢部DTV-3217SM，嘩！不得了，佢唔只寫明用正SHARP膽，而且機形設計重有幾分最新AQUOSLC-32AF3H感覺，真係大膽！睇畫質，秉承SHARP嘅「好色」傳統，色彩夠標又夠真，真係「睇」唔出佢係國產機。
睇電視係一般用家慣常動作，不過須知電視廣播線數較低，拉到32”咁大，好多時都會予人鬆散嘅感覺；不過DTV-3217SM嘅畫質屬於「柔和」一類，用佢嚟睇電視時感覺特別滑淨，而且Noise亦較一般機低，電視狂熱分子必定一睇愛上！
顏色表現 立體豐富
戲肉當然係睇碟啦！先睇解析度，DTV-3217SM行現時32”最高階Standard的1,366×768，數值上重要比LC-32AF3H嘅960×540為高，畫質當然更細膩啦！800:1的對比度及450cd/m2的光亮度，亦令畫面層次分明，高反差嘅黑位、白位都叫完全出到，遇上動畫一類色彩豐富嘅畫面就更出色，色彩漸變過渡夠順滑，而且非常富有立體感，用嚟睇碟都算稱職。
機價望落稍貴，現時一般國產、韓機普遍做緊7、8千，佢就賣成$9,480，不過據知個Panel來貨價已佔機價近8成，就如SHARP同吋數的LC-32AF3H都要賣上$20,800，Shinco賣平一半價錢，都算對用家們有交代！
測試區
PROFILE
顯示屏：32"
解析度：1,366×768
光亮度：500cd/m2
對比度：800:1
可視角度：170O
擴聲器：10W×2
電視系統：內置
端子：HDMI、色差、VGA、S-Video、AV
查詢：Shinco（36699888）
高畫質播碟利器
另一隻新機DTV-3220AM，係記者測試時較喜歡的型號。兩機規格差唔多，而DTV-3220AM嘅400cd/m2光亮度，同600:1對比度重要比上面嘅DTV-3217SM低一截㖭，何解要鍾意佢？當然唔係因為佢平咗$800嘅原因啦！
呢部機使用韓國LG膽，還使用了最新「第7代LCDTV技術」，點與點之間做得特別緊密。就肉眼睇，DTV-3220AM屬較「利」機種，形象啲講，假設行SHARP膽的DTV-3217SM擁有歐洲機柔和感，那DTV-3220AM就相對有日本機的銳利感；玩機前提下，太銳利嘅話，睇較低畫質的電視時，爛及起格情況較嚴重，不過相對玩較高畫質的DVD時，佢就會變成一部高畫質的「利器」，所以玩法絕對大不相同！
PROFILE
顯示屏：32"
解析度：1,366×768
光亮度：400cd/m2
對比度：600:1
可視角度：170O
擴聲器：8W×2
電視系統：內置
端子：HDMI、色差、VGA、S-Video、AV
色差線谷玩1080i
香港未見數碼廣播，能將普通DVD谷上1080i的DVD機愈見渴市！呢類機種暫仍以日本機作主導，不過閒閒哋數千元一部！Shinco呢部DVP-1680不同處，就是能以色差線將DVD影像「谷上」1080i之餘，賣價重只係幾百蚊！須知現時一般日產1080iDVD機，都只能以HDMI作輸出；雖感覺上會較少失真，不過這個1080i是由原本DVD的480p谷出嚟，出得愈清反而愈多Noise！相反DVP-1680以色差線輸出，測試時感覺效果幾好，畫質平滑過渡，「起渣」情況相對日本機冇咁嚴重；再講，機價只係$799，普通DVD機都要啦！
