去年十一月尾，八方講過名牌地產分析員瑞銀證券董事總經理林奮強，將不再做分析員，但仍會留喺瑞銀，轉行做基金經理。線人報料畀八方知，林奮強噚日lastday，脫離分析員行列做芬佬去了。繼摩根士丹利前研究部主管卓百德，同埋有「地產大淡友」之稱嘅滙豐證券前地產研究部主管張一鳴之後，林係第三個名地產分析員轉做芬佬。八方覺得咁多有份量嘅地產分析員轉行，真係可惜。林奮強有「大好友」之稱，言論每每足以影響地產股股價，甚至有股民視他為樓市專家及明燈。
另外，去年離開渣打加盟滙豐嘅王冬勝，三年內兩度擔任銀行公會主席，可算罕有；因為公會主席一職，由三家發鈔銀行嘅代表輪任，所以做完一任，要再過兩年後先可以重任。記憶所及，王冬勝喺○一年及○四年，代表渣打出任公會主席；今年則首度代表滙豐以公會主席身份主持公會委員會會議。問到三年內兩任主席嘅感受時，王冬勝話喺銀行界二十幾年，本身同行內人已經稔熟，對於佢嚟講，代表邊間銀行出任銀行公會主席分別亦不大；不過，滙豐歷史久遠、又是本港嘅大規模銀行，一舉一動均受業界注視，所以佢話要小心部署任何想法同構思。
傳真︰2623-9278
電郵︰[email protected]