雖然市場上有唔少聲音話，今年樓價會有得升，但近排仍然有業主以低於市價賣樓，好似青衣盈翠半島，剛剛就錄得一宗低過市價一成四嘅成交。
利嘉閣趙敏健話，盈翠半島二座低層D室，有海景，面積九百六十三呎，成交價四百一十九萬，每呎僅四千三百五十一。上手業主係投資者，九八年用咗五百零五萬六千，購入呢件貨嚟收租，到咗最近，租約期滿，佢先至改為拎出嚟放售，𠵱家賣出，埋單計數，蝕咗接近八十七萬，逾一成七。
若果唔係低市價咁多賣樓，呢個投資者就差唔多可以平手離場，佢咁急住賣樓，似乎唔多睇好後市。
電郵地址：[email protected]