恒指又升73點，滙控（005）、和黃（013）與聯通（762），總共帶動恒指62點。滙控與和黃大把C輪揀嚟炒，下周要留意。聯通C輪好少，炒賣者唔多。
聯通C輪9772：聯通收6.85元，升0.20元。市場估計𠵱家國內固網企業，亦有機會獲發3G牌，咁就炒上。
聯通C輪6隻，兩隻冇成交。最旺係9772，搵對象埋手，只此1隻啱睇，其他唔使理。9772收79仙，升14仙，5月尾夠鐘，溢價3.2%，槓桿率8.7倍（有效6.2倍），引伸波幅28.2%。聯通C輪中，數據最靚嘅係佢。
和黃C輪9127：和黃升1.30元，帶挈C輪9127成為是日輪王，由3.6仙飛上8仙，升幅122%。唔算乾升，有122球易手，金額都有1.2球。
隻輪行使價77.888元（正股76.65元），仍然係價外輪，本月17日最後交易，剩番7日買賣。炒呢隻，要預咗冇晒。和黃C輪搵邊幾隻埋手，下周再介紹。
和黃P輪9134：和黃升，和黃P輪梗係冇運行。9134由6仙散落3.4仙，冇咗43%，有6球易手。
隻輪行使價72.50元，屬價外，正股跌唔到72.50元以下，隻輪救唔番，最後買賣本月23日。和黃個勢向上多過向下，隻輪最後命運，走唔甩作廢。昨日掟28萬銀落去博嘅炒友，啲錢飲雪水居多，不過隻輪唔會有乜散戶做嘢，淨係見發行商掛兩邊牌。隻輪去年7月發行，發行價28.8仙，又添一批輪海冤魂。
章盛