「PK」踩板：食雪糕喪劈樓梯MiniGame勁PK

踩板來來去去都是玩玩花式，日踩夜踩有時都幾悶棍。尤其是在香港，可以踩板的地方唔多，平時又無乜大型比賽，練完花式無得表演，真係無癮。為了增加踩板的樂趣，有板仔就諗出幾款MiniGame，在鑽研新花式之餘，又可以跟其他板仔自娛一番，當中最「PK」嘅可算踩住板食雪糕同喪劈樓梯，勁好玩刺激！

記者：梁學文　
攝影：楊錦文　
示範：亮、John、Daniel、元、華

先來熱身

一開始當然來啲輕「Kan」嘅好啲。大家輪流玩幾個花式打出唔同的Tricks。一個成功完成，下一個就要跟住做，做唔到就算輸。每人各有五次機會，當有齊Skate五個字母就是GameOver。呢個Game係一個幾好的熱身遊戲，難度唔算高。Hey，1FootOllie，你接！

層層叠彈跳勁

SkateBoard層層叠好考Ollie彈跳能力，相較之前兩個玩法，難度最高，而且有一定的危險性。玩法係將滑板叠起，好似跳高咁，跳得過最多塊板的就為之贏，玩法簡單但難度極高。若彈跳力唔多夠，千祈咪逞強！

接龍難度高

啤牌可以玩接龍，連SkateBoard都可以玩。Skate接龍難度較單純玩Skate高，因為除了要跟上一手動作之外，重要自己加多個動作。接龍的難度在於駁Trick的時候未必啱腳步，好考即時反應，一修正唔到就玩完，通常做到六個連Combo已經好叻。

同場加映

贏：踩板食雪糕
輸：劈樓梯

贏咗三個MiniGame的可以有雪糕食，不過就要玩住板食，重可以有一個表演的機會。阿元就以全勝的姿態完成了三個Game，贏得雪糕一杯，不過就要表演打Trick食雪糕。結果梗係難佢唔倒啦，連打KickFlip同兩個1FootOllie都無問題，雪糕無跌到之餘，更加無食到成面都係，勁！輸咗無得食就要玩劈樓梯，劈樓梯即係跳樓梯。平時唔係踩板跳幾級都已經唔容易，重要加埋塊滑板，要成功跳完又落到地，真係好難。