立法會噚日出西九報告，再次炮轟肥龍嘅計劃，但肥龍噚日淨係出張稿回應，重好罕有咁拖埋太太羅美美，一齊參加女青年會嘅籌款晚會。許太着件藍色套裝搶晒鏡，八方記得，許太好少同肥龍一齊出席公開場合，就連肥龍就任政務司司長，許太都冇捧佢場。佢都同八方講，今次同肥龍出嚟係無辦法啦，有時都要陪吓佢嘅。
肥龍有橋王之稱，許太都有返咁上下斤両，唔會輸畀肥龍，講嘢絕對好聽過好多官太，一啲都唔會驚記者。八方問許太：「司長咁掂，又係橋王，驚唔驚煲呔搵佢做多五年呀？」許太笑笑口寸佢老公：「好掂咩？政改都過唔到啦！」許太好堅咁話畀八方知，總之老公係做兩年，呢樣嘢唔使佢開聲同老公講，雖然西九龍同政改都係唔易搞，但係辛苦極都係做兩年！
喺屋企講少啲嘢
老公做嘢咁大壓力，許太話，成日都會安慰吓佢、鼓勵吓佢。但點樣安慰呢？許太就講笑話，喺屋企講少啲嘢啦！唔知係咪「唔好煩住佢」以免為佢添煩添亂咁嘅意思呢？
許太同記者講咁多嘢真係好，但肥龍就乜都唔講，問佢西九就淨係得一句咁大把，話西九係冇乜爭議喎。
許太咁好急才，肯定成日同肥龍擦出火。據聞許太一直好唔鍾意肥龍重出江湖，重趟官場這潭渾水，唔知係咪咁，就一直唔肯高調以司長夫人嘅身份，同肥龍出席公開場合，昨晚與肥龍喺同一公開場合亮相，係呢兩年任內第一次。
啱啱正式退休嘅詩姐，噚日都有在同一場合亮相。問到詩姐係咪重返民建聯，佢就話畀佢休息吓先，總之佢係前問責官員，所以退任後就算加入政黨，都係唔使過冷河嘅！
傳真︰2623-9278
電郵︰[email protected]