反虐殺行動：全城反虐貓3絕招緝兇

旺角虐貓兇徒仍未落網，引起公憤，近日反虐殺行動升級，先有香港愛護動物協會懸紅一萬元加碼至兩萬元賞金緝兇，在明天，由動物地球、眾裏尋家和HongKongAlleyCatWatch三個團體發起的大遊行，聲勢夠浩蕩，希望善忘的香港人記在心，還請一直借咗聾耳陳隻耳的政府挖清耳垢，聽完訴求辦事積極啲。
記者：拾壹
攝影：何家亮

兇手的心理大有問題，參考電影《死亡寫真》橋段，在後巷貼滿動物死亡寫真，以同好者身份接近兇手，伺機行動，橫掂差人成日放疑犯走，行動的危險度由100%減為50%。

■列印大量動物死亡寫真照片，留下線索讓疑兇聯絡。

金魚街一帶後巷逾十條，好些巷中有巷，為巡邏增加難度，點捉？暫時對兇手真係無可奈何，都係毛主席嗰句：「人多好辦事」。希望愈來愈多義工加入巡邏行動。

■效法古人深夜行動，穿一身黑色緊身衣，伏在暗處等待疑兇出現。

■後巷不乏竹籮、膠桶等物，必要時拿起以為逮捕工具。

唔可以靠等，咪靠嚇，肥姐同欣宜分別在台慶夜扮演美人魚和迪士尼開幕日扮白雪公主豔驚香江，用她們做紙牌差人一定掂。

■肥姐，製成紙牌，一定可以威過警察叔叔，大收阻嚇作用。

禽獸不如的虐貓兇手，正正是人渣的人辦，點解法官判刑咁輕！不過最可怕的並非兇徒逍遙法外，而是竟然有好多人重未知旺角虐貓案係乜東東！無論知道不知道，大家動吓腦筋，將兇手繩之於法。

對兇手最大的懲罰，就是令他知道錯喇！罰他去愛護動物機構做社會服務令就最好。

■叫兇手日日到犯案現場掃垃圾都咪話唔驚。

街坊一般傾向以法律制裁，認為判監起碼以年計，甚至終身監禁。

■兇手咁鍾意捉貓，將個頭放入貓籠裏遊街示眾。

好多人想做蜘蛛俠儆惡懲奸，兇手如斯殘忍，你不仁，我不義，打！

■有人建議貓爪侍候兇手，如果用貓糧或貓沙照頭淋都有驚嚇作用。

傅明憲：「兇手唔易捉，靠市民幫手監察和舉報。刑罰重啲至可以收阻嚇作用，不過長遠嚟講，都係教育市民愛護生命，唔糾正呢種思想，將來唔排除會變成連環殺人兇手。呢個已經係社會問題，全城應該關注。」

胡杏兒：「估計有人看過事發經過，懸紅可以鼓勵多啲人講出嚟。捉佢去青山醫院做心理評估先，如果佢無病就真係天生殘忍，不排除佢可能傷害小朋友。蝦弱小的行為好差勁，會遭天譴。罰佢做社會服務令反思。」

Krusty：「我哋兩個都有養貓，一齊扮貓引佢出現。我學過跆拳道負責打，阿嵐就負責綁起他。呢種人試吓手腳被縛一星期，就知道受傷的貓的滋味。」

小儀：「搵多啲便衣巡邏，裝設閉路電視，希望可以捉到佢。現時刑罰太輕，不排除會出現好多copycat。懲罰兇手去愛護動物機構做社會服務令，俾佢知道動物係有人性，如果佢識得自責，之後咪唔會再犯。」

CP：「帶貓出街，引他出現。呢種人肯定是弱雞的人，受慣欺凌，捉到坐10、20年啦。」

劉小姐：「去後巷放蛇埋伏，應該會捉到佢。呢種人應該罰$10,000，坐監起碼半年。」

蔡先生：「唔知佢幾時會出現，好難捉喎。呢個人黐線，但人同禽獸有別，我哋唔可以拗斷佢手腳懲罰，判佢坐監4個月。」

Carrie：「捉佢惟有靠警方巡邏多啲。懲罰呢種人一定要立法，虐貓同虐人一樣，貓都係生命，唔應該看輕。亂拋垃圾都罰$1,500，起碼罰$10,000同坐三年監。政府應該做多啲教育工作，等社會關注多啲。」

「1.08大遊行」發起人之一DavidWong是獨立愛護動物人士，去年九月發起數起活動，希望能引起社會關注虐貓問題。他認為虐貓的源起是流浪貓問題，所以一般人和兇手都要再教育，無遺棄就無流浪貓。現時愛護動物的組織一直有替流浪貓做絕育手術，然後立即放回其族群，因為流浪貓離開太久，已會導致族群再繁衍來填補遺失的成員，屆時又會製造更多流浪貓。當然，若香港政府能效法先進國家如北歐，禁止一切寵物買賣就最好，大家齊齊養流浪貓。

■義工兩度在案發現場派發及張貼街招，但不知誰人撕掉，只剩數張。

集合時間：1:00pm
集合地點：中環遮打花園
遊行路線：遮打花園至政府總部
活動內容：遞交請願信
查詢：www.animalearth.org