昨日提到新濠國際（200），據聞分帳方面可能獲得優惠條件，昨日股價又升4.52%，收10.40元，但經紀陳就話小初，睇漏咗1隻濠賭股，就係英皇娛樂酒店（296），佢話英皇娛樂旗下喺濠江嘅酒店，前日已正式開幕，所以呢幾日一直有買盤密密吸納。
英皇娛樂昨日升6.19%，收2.575元，成交金額2675萬元，股價幾乎接近52周高位咁滯。
佢又話，今次英皇娛樂濠江酒店開幕搞得好熱鬧，聽講下周五重請埋好多證券界中人去參觀，當中自然包括芬佬同埋分析員。
但同人唔同命，在濠江持有財神酒店股權的冠中地產（2928），昨日就失驚無神急跌13.58%，收0.70元，不過成交就唔係好大，得2135萬股，金額1637萬元。經紀陳就話應該無咩事發生，只係隻股一直升過龍，家陣調整實在合理。
查實冠中舊年供完股以來，股價由未拆細前的1元起步，累積升幅驚人，就算以昨日股價0.70元計，等於未拆細前的3.50元，真係一啲都唔平。
慕容小初