自由黨主席田北俊噚日開完立法會會議，即刻唔見咗人，原來佢趕住去維園，睇屈臣氏世界網球冠軍挑戰賽。唔講唔知，田少都係網球發燒友，重係今次主辦單位香港網球贊助人協會嘅副主席，所以一定要捧場啦。
除咗田少，張宇人同夏佳理噚晚都有去睇打波，唔怕天寒地凍。
田少咁風騷，佢嘅同事梁君彥就好勞氣，話唐唐上星期拉頭馬都唔通知聲，所以一定要佢減稅補數。
梁議員噚日同傳媒食飯，講到紅酒稅，佢話唐唐無論加稅或減稅都一樣會被人鬧，皆因加嘅話，佢收埋啲酒會升值；減呢，又話佢可以買平酒。
不過，梁君彥都係覺得香港啲酒稅太重，外國一杯紅酒五、六十蚊，香港就要過百，實在貴得離譜。
傳真︰2623-9278
電郵︰[email protected]