港股連升3日，噚日恒指一度上升173點，尾段有回吐，收15271，升71點，成交活躍，有330億元。大市已明顯轉勢，今後走勢會大漲小回，升破15500阻力後，可向16000推進。
地產股續受惠息口見頂的憧憬，長實（001）最高時升1.90元，收82.95元，升0.60元；新地（016）同恒地（012）同有0.50元進帳。和黃（013）收75.35元，升0.15元，暫時係大落後股，大行多看好其前景，目標價由90元至95.90元不等，和黃一升破76.70元阻力，好快可見82元。
內地地產股升勢真係一發難收，兩大的中國海外（688）同華潤置地（1109）繼續領放，前者收3.90元，升6.1%；後者收3.375元，升1.5%。兩大急升後，市場注意力將會落在落後股身上，只要資金一堆落去，落後股就會發力而上。
有分拆REIT概念
時間唔係好耐，只係大半個月，中海由3.075元升到最高的3.975元，升幅29%；華潤置地由2.75元升到3.50元，升幅27%。同級數嘅北京北辰（588）則大落後，𠵱家重未上番上月中的2.15元高位水平。
其實，內地地產股咁強勢，冇理由「掉」低北辰，聽講芬佬𠵱家做緊中海同華潤置地，而北辰重係一路收集緊，但若果佢哋認為時機來臨，北辰就會打破悶局，破位而上。
基金收集北辰，咁有耐性，當然係想食大茶飯。事實上，北辰通過一直到2020年的城總體規劃，發展東部為副中心，並將京津冀融合，其中北部便是連接天津的路線，而北辰的物業，不少集中在北京東北部，食正未來的發展大勢，非常有利。
北京已進入奧運建設周期，北辰亦已全面啟動，興建國家會議中心、奧運媒體村同北辰大廈等，未來5年的資金需求約140億元人民幣，由於發行A股未上日程，因此北辰分拆REIT上市集資的可能性甚大，分拆後資產折讓幅度會大為收窄，股價有更大動力上升，若衝破2.15元高位，量度升幅係2.50元，升幅接近2成。
郭兆誠