二人女子組合Krusty的張詠恩和活己嵐都是愛貓之人，她們分別養了異國短毛貓PetPet及家貓PuPu，兩隻貓仔都惡名昭彰，PetPet專欺負家中的斑點狗；而PuPu經常諗計咬爛主人的胸圍，認真反斗。
女子組合Krusty成員張詠恩（Jan）養了一隻斑點狗及一隻兩歲的異國短毛貓PetPet，阿Jan表示原本PetPet是屬於弟弟、Boy'Z成員張致恆（Steven）的，不過因為Steven沒有時間照顧小貓，所以其母把PetPet接回家中。
執細佬手尾
阿Jan說：「Steven之前話去到寵物店，PetPet係咁對住佢『喵』，所以就買咗PetPet返嚟，點知佢自己根本就冇時間照顧隻貓。每一日畀完嘢PetPet食，Steven就出去做嘢，冇時間理隻貓，所以媽咪拎PetPet返屋企。」
PetPet經常欺負家中的斑點狗，更將狗籠據為己有，阿Jan說：「成間屋咁多地方佢都唔瞓，偏偏就霸住個狗籠。PetPet又成日匿埋一邊，之後就好高速咁衝去隻狗面前，打佢兩巴，跟住又好快速咁走開。」阿Jan笑言可能斑點狗長期受到PetPet欺凌，故此每次她買新玩具給PetPet時，斑點狗一定咬爛PetPet的玩具。
活己嵐養的一歲家貓PuPu是唱歌老師送贈的，她說：「唱歌老師話執咗一隻個樣好似我嘅貓仔，我見到佢就忍唔住帶咗佢返屋企，初時當然有俾阿媽鬧啦，不過𠵱家阿媽錫佢多過錫我。」後來活己嵐發現阿Pu的惡行，她說：「我通常會將啲胸圍掛喺房門後面，好多時我聽到阿Pu撞門，原來佢高速撞埋道門，撞得幾次個胸圍就會跌落地，佢就會起勢玩條帶，好多個bra都係俾佢咬爛！」
採訪：李珮洳 攝影：陳俊強
髮型：Jatco＠ILCOLPO
