個市高位有回吐，好正常。恒指升過173點，埋單升71點。中銀（2388）開市十幾分鐘，殺上15.60元，最後收15.40元，仍升0.10元，呢隻要睇住，揀靚C輪炒。
中銀C輪9068：個別非主流嘅中銀C輪漲到七彩，2195升28%（9萬銀成交），9161飛升92%（11萬銀成交）。前日推介隻9777，見過1.11元，收0.98元，仍升4格。兩日計埋，急彈34%，前日評佢做肥仔輪冇錯。
今日再推介另1隻中銀肥仔C輪9068，隻輪係昨日唯一下跌嘅熱門貨，收76仙，跌4仙，跌價買貨更加着數。6月尾夠鐘，溢價1.6%，槓桿率20.3倍（有效12.6倍），引伸波幅13.7%。正股去年8月中最高價16.95元，恒指距去年最高只差237點。恒指重見上次高位，中銀重見上次高位，好大機會，有半年時間睇（9068夠鐘嘅時間）。中銀見16.95元，隻輪值2.1元，潛在升幅1.8倍，夠晒肥仔。
長實C輪9147：長實（001）收82.95元，升60仙。吼低位買C輪，正路之選係9147，3月初夠鐘，輪價25.5仙，溢價4%，槓桿率32.5倍（有效16.3倍），引伸波幅20%。有心理準備隻輪波幅好大。
章盛