天才少女鋼琴家張緯晴將會喺下個禮拜五、六，聯同香港管弦樂團演奏貝多芬第四鋼琴協奏曲。張緯晴年僅十四歲，小妮子喺三年前參加英國威爾斯舉行嘅靈閣嶺國際音樂大賽，以十一歲之年勇奪西洋樂器組冠軍，一舉成名。
今次同緯晴合作嘅港樂，由艾度迪華特指揮。除咗貝多芬嘅名作，演奏會曲目重包括莫扎特嘅《後宮誘逃》序曲、布烈頓嘅《青少年管弦樂隊指南》，連電影《星球大戰》嘅主題組曲都有。演奏會係由何鴻毅家族基金贊助，喺香港文化中心音樂廳演出，門票一百至二百五十蚊。
傳真︰2623-9278
電郵︰[email protected]