踏入○六年，大家日日都傳吓政府高層執位嘅消息，而講得最多，梗係工商及科技局鬍鬚曾去做特首辦主任，幫煲呔睇住個檔。咁鬍鬚曾個位又邊個接呢？盛傳係公務員事務局局長王永平，因為佢熟行；至於平叔個位，最新版本由作風硬朗嘅現任工商局常秘俞宗怡頂上，真係日日有新猷。
平叔愛做公務員頭頭
八方噚日喺酒會見到平叔，問佢係咪會調位時，平叔只係話唔會回應揣測性嘅報道，並冇否認。但有八卦友就同八方講，平叔好鬼鍾意坐𠵱家呢個位，身為一眾公務員頭頭喎，幾威呀，所以佢都唔想走㗎。
不過，班公僕一聽到Denise俞會接替平叔出任局長時，不約而同拍爛手掌，由此可見佢哋對Denise好受落，佢阿姐一旦接棒，一定能服眾，至少班AO仔一定唔會反佢枱。
D姐為原則頂撞煲呔
人稱俞姐或者D姐嘅Denise，點解咁深得公務員民心呢？當然都係因為佢本性純良，對同事又無微不至，最重要係佢會雪中送炭，唔會學得某啲人落井下石。
有D姐舊同事同八方講，話試過某AOact咗個位一段時間，最終升唔到級，當然好唔開心啦，D姐知道之後，就特登送咗紮花畀佢勉勵一番，真係令人好感動。有人亦話，D姐喺公務員中真係德高望重，幾乎每個識佢嘅人，都讚佢態度誠懇。
以前煲呔未坐正，D姐為咗堅持原則，試過頂撞煲呔；做細嘅見到上司咁硬淨，又點會唔支持佢吖。D姐有咁多掌聲，都係佢自己賺番嚟嘅。好多公務員都話，如果佢做boss，一定會好，至少佢不畏強權。
另一個有機會接任平叔位嘅黑馬，就係現任公務員事務局常秘黎高穎怡。兩位鐵娘子，論資排輩都係D姐高幾班，黎太更係前年先升正D8，怕且升都唔會升得咁快啩。
不過，有人都提醒八方，唔好唔記得，D姐好鍾意打golf，對官場升遷睇得好淡，佢重不時約埋劉勵超一班老友去打波㖭。所以，佢阿姐最後肯唔肯減少啲打波時間去為公僕服務，都係決定性因素。
傳真︰2623-9278
電郵︰[email protected]