好耐冇喺香港賣樓嘅菱電，所持何文田凱旋居單幢樓，頂樓複式終於賣出。個盤七年幾前賣樓花，到最近，先至賣埋最後一件貨尾。 港置傅守敏話，件貨逾千八呎，連車位以九百四十萬成交，每呎五千一。 幢樓喺正勝利道內街，距離旺角鬧市只須行十幾分鐘，去火車站非常方便，可以話旺中帶靜。加上嗰區暫未有新供應，中港商人買家見樓市氣氛靠穩，所以決定入市。