到私人會所食飯。飲費冇五星酒店咁貴，唔會好肉痛。昨日講餐飲收費毛利七成，係以售價計。譬如一罐汽水成本二元五角，賣八元三角，毛利五元八角，毛利率係七成，售價係成本嘅三點三三倍。毛利率去到九成，售價就係二十五元，係成本嘅十倍；毛利率去到九成五，售價係成本嘅二十倍，即五十蚊。大酒店賣一杯汽水收六十八蚊，你話計埋環境、服務、高格調氣氛之後，是否物有所值？
到私人會所吃飯，如非會員，恕不招待，唔係人人可以入內，一啲有女士專門為你服務嘅隱蔽會所，俗稱「鐵竇」，當然係例外啦。
會所比大酒店便宜，兼夾好食，起碼有兩間。譬如上海總會嘅上海菜，論質素，絕不輸蝕。港島有幾間上海菜「名店」，有新有舊，訂位甚為艱難，左丁山都試過，一係名大於實，價錢貴，一係好好味，第二朝就覺得喉嚨乾涸，明顯係落味精太多。上海總會勝在均勻，價錢公道，難怪董生、曾生得閒都幫襯。
第二間就係馬會沙田會所，聽唔少馬會會員話馬會粵菜唔好，價錢貴。左丁山不敢苟同。喂，馬會唔收加一，唔收閒錢，泊車免費，加起嚟點會貴得過酒店、名店呀？新年期間，沙田馬會凱旋廳爆到七彩，我哋成班口刁人在此聚餐，大編輯話呢度嘅鹽焗雞正過「生記」，建築邦話蛋撻精彩過福臨門，經常賣清光（呢晚我哋就來遲一步，食唔到），工程陳話紅燒豆腐靚到冇得頂，左丁山醒起凱旋廳嘅「金華玉樹雞」與數大灣仔名店相比，有過之而無不及。呀，幾乎講漏一樣，馬會係唔准用味精，十分衞生，但食慣味精，無味精不歡之老友，就會覺得凱旋廳菜式嘅味道淡啲。左丁山得老友邀請，港九各大私人會所中菜廳，以粵菜為主，由南區海邊去到九龍獅子山旁，全部試過唔少次，數嚟數去，夠膽話沙田馬會凱旋廳最好。