近呢幾年，新舊曆年相隔愈嚟愈近，各大商場嘅節日宣傳攻勢，想唞吓氣都唔得，未搭起個場，都已經要爭見報。
嚟緊會係狗年，觀塘apm嚟個「祥祥狗狗賀新歲」，遲吓場內中庭，會有隻二十呎高四十五呎長嘅「祥旺潮狗」桃花陣布置。桃紅色為主，配合十幾棵真桃花。另外，重有香港figure大師EricSo今年新作展示，大玩潮狗造型。月底年二十九嗰個禮拜，會有室內年宵夜市攤位，最後兩日，可能開通宵，認真破格。
搭幾個地鐵站就到嘅鑽石山荷里活廣場，會出動另一位大師水禾田，以百變醒目狗為題，布置個場，又有由佢親自設計嘅狗年利是封。
如果坐地鐵過海，都係幾個站，去一去鰂魚涌太古城中心，會放置一座兩邊圍咗錢幣嘅巨型金元寶，隔籬梗唔少得狗仔裝飾與桃花。
電郵地址：[email protected]
