年頭除咗樂壇多頒獎禮，商界都唔輸蝕，噚日《HKBusiness》月刊就喺信德澳門賽馬會搞咗個「傑出企業公司2005頒獎禮」，得獎公司有成51間，當中唔少大家都好熟悉，好似八達通、3M、藍十字保險、新世界電訊、康泰旅行社、新加坡航空、飛利浦電子、中電和皇冠車行等。
得獎者中，最搶鏡就係賭王四太梁安琪（圖），佢唔單止代表澳門賽馬會領獎，重借埋地方畀大會頒獎，真係唔話得。佢話得乜嘢獎都開心，但最好就係贏馬嗰啲獎，事關有獎金又有獎品嘛。
問佢06年大計，四太就用咗陳四萬嘅名句「見步行步」來回應，因為日日都有事發生，計劃咗都隨時會變，不如實事求是，好過成日得個講字。