唔知係唔係呢兩日大市升得勁抽，隻隻當炒股都係咁創新高，大家炒到無乜好炒，咁蹺澳門嘅漁人碼頭又開幕，所以靜咗好耐嘅澳門賭股又有人睇番。
噚日賭王位公子打理嘅新濠國際（200），股價突然抽上，最高見過10.05元，收9.95元，升咗7.56%。新濠成交股數一啲都唔細，有成1148.8萬股，金額1.12億元。
經紀黃話，原來有證券界人士最近見過新濠，探聽之下，發覺賭王好似又有着數畀新濠，就係澳門博彩同埋新濠啲賭場，分成方面會修訂好啲條件，即係新濠將來或者會分得多啲，另外據講佢嘅角子老虎機生意繼續好掂。
查實新濠早幾日因為話退出唔參與星洲賭牌投標，股價一度受壓，倘若呢檔生意投資大又冇肉食的話，真係無謂走去同人爭。
不過咁，近期有啲數據顯示，濠江的投注額好似有下降迹象，所以其他濠賭股就並無因為新濠急升而一齊急升。
慕容小初