前市政局議員林澤飄晚境淒涼，真係令人慨歎香港從政前途黯淡，加入富貴黨、保皇黨，都叫做有班商家、有阿爺照住，但做民主派就預咗要捱窮，如果從政二十幾年都冇位上，做嚟做去都係做第二、三梯隊，青春就用晒、民主又爭取唔到、錢又賺唔到，下場就重淒涼。
八方記得以前聽過民主黨一位黨員講，佢以前教開書，如果佢冇從政，繼續留喺中學教書，𠵱家分分鐘已做到校長級。咁又係，同校長比較，立法會議員嘅人工都冇咁高，加埋俾人打壓，又唔返得大陸，雖然民主黨都係第一反對大黨，但如果隨街問啲市民，你要做民主黨主席定係做校長，可能好多市民寧願做校長。
全職從政嘅卿姐，就一直喺議會爭取議員退休金，但行政署一直都冇聲氣，因為政府覺得議員唔係專業、而係公餘服務。卿姐話，政府唔鼓勵人做全職議員，搞到全職議員連最基本嘅退休保障都冇，咁點吸引人從政呀？
傳真︰2623-9278
電郵︰[email protected]