年尾出完雙糧花紅，好多打工仔都心思思跳槽，所以頭一季大公司人事變動消息特別多，好似國際網站eBay咁，噚日就宣布請咗ZUJI.com香港區話事人黃朱寶燕（KerryWong）加盟，做香港區董事總經理，直接向新加坡eBay地區總監DanNeary滙報。
Kerry同華華講，佢話只係返咗新工兩日，重適應緊新環境，事關之前ZUJI.com嘅業務全部都係同旅遊有關，家吓喺eBay要面對嘅嘢多好多，日日都有新事物，除咗管理，重要睇埋生意增長，所以挑戰大好多。
除咗ZUJI.com，Kerry重喺美國運通及美國羅森柏斯（最近被運通收購咗）做過十幾年管理層，經驗相當豐富，新事物應該難唔到佢嘅。