大市噚日跟外圍勁升255點，高收15200，成交更大增至345億銀，大部份大隻佬如銀行股或國企股等均見急升，但二三線股相對就斯人獨憔悴。經紀陳就話，傳統智慧一向都係咁，等班大隻佬炒完，隨時又到細價股發圍。
講起上嚟，早排一度急回的大陸地產股已經陸續翻身，例如早前經紀黃話有力再上嘅富力地產（2777），昨日升2.17%，收28.30元，再創新高，至於一直大落後的上海復地（2337），更勁升8.4%，收2.90元。
於是經紀陳就話，細size嘅大陸地產股中新集團（563）實在係備受忽略，可以留意。
中新早前經紀陳都推介過，最高見過0.80元後，就一直在0.70至0.80元徘徊，悶到小初想瞓着咁滯，但經紀陳就話，人哋股價企得咁硬淨，擺明係有心有力，所以可以畀多小小耐性。佢又話，中新家陣地產項目主要在北京及深圳，但大股東在其他地方如上海都有項目，所以都具有注資概念。中新昨日跌2.56%，收0.76元。
慕容小初