港股在2006年已連升兩日，第一日小升，第二日大升，且成交配合，急增到345億元，只要未來幾日，恒指能守穩在10日線（15110）同20日線（15058）之上，則升破15250的高位阻力後，可向另一個高位15500推進。
港股上月底急挫近170點，落到一個半月來的低位，走勢確實係轉壞，市場亦愈來愈多人加入睇淡行列。假後復市，略為回升，好多人都只係當佢技術性反彈，冇大改變，但噚日以大裂口高開，兼大升255點，且動力強勁，形勢才完全改觀。
中資股個勢真係好勁，國企指數高收5569，大升157點，已衝破去年8月的高位。預期人民幣今年會再升值，內地地產股繼續有追捧，中國海外（688）搶上3.675元收市，再升4.2%，華潤置地（1109）亦升3.1%；新世界中國（917）最高見3.45元，後回收3.35元，升2.3%；麗豐（1125）守穩0.33元，但成交再增到1.2億股，大行在現水平動作頻頻，相信交完波後會破位大升。
已成高增長股
鋼鐵價格回穩，鋼鐵股股價全面回升，馬鋼（323）、鞍鋼（347）同重鋼（1053）分別有2%至3.7%進帳，近年進軍鋼鐵業並大展拳腳的首長國際（697），更高收0.53元，升近4%，成交更上到2800多萬股，比前日大增15倍。
首國呢輪頻有動作，去年下半年增持秦皇島首秦金屬材料股權至96%後，噚日宣布同韓國上市公司現代重工業建立策略性夥伴關係，現代會入股首秦，而首秦亦向現代供應作造船用的熱捲鋼板。首國增持首秦係以PE約2.2倍計，相信股權變動會帶來厚利。
首國成功轉型後，經已脫胎換骨，05年（12月年結）的上半年，營業額25.4億元，升83%；獲利3.34億元，大升2.2倍；每股盈利7.2仙，估計全年每股盈利12仙，預測PE僅4.4倍。
首國升破50日線（0.512元），且有大成交支持，確認升浪開展。首秦日後產量會以倍計上升，首國已成高增長股，以PE7倍計，股價已可見0.84元。
郭兆誠