政改甩轆收場，煲呔梗係好冇面，所以一定要卸膊，將所有責任推落民主派身上，先至有得向中央交差，民主派從此就被政府易名為「反對派」，真係無厘頭。下星期煲呔去立法會答問大會，班議員一定會追住佢嚟問。
不過，反對派個名雖然難聽，但係並非百害而無一利，至少會多幾餐飯食，話唔定同啲局長關係重會好轉㖭。八方唔係亂噏㗎，當煲呔將民主派定性為反對派後，好多政策局嘅馬仔，都不約而同表現得人心惶惶，因為佢哋呢一年，仍有好多關鍵政策要出台，除咗呢啲親政府陣營之外，都一定要拉攏民主派撐場，先夠票通過。
點知煲呔就膽粗粗，係咁批鬥民主派之餘，重好曖昧咁暗示，唔排除同民建聯、自由黨愈行愈埋，慌死一腳踢唔死民主派咁。班局長日後要同民主派拉票，就更加難上加難。
八方聽聞，為咗減低煲呔嘅破壞力（唔係親和力），個別局長最近主動同民主派「修好」，民主黨更加係一個主要目標，事關達仔曾經講過，既然政府話我哋係反對派，我哋咪乜都反囉。
達仔受寵若驚
查實八方一向覺得，民主黨如果支持政府，佢哋都幾幫得手，唔單止一次過拉晒佢哋九票，重可以搵佢哋幫幫手，拉埋卿姐等獨立泛民嘅票。
首先向民主黨發功嘅，就係周一嶽。一向只會同民主黨阿富同肥仔明聯絡嘅周一嶽，噚日竟然打電話畀達仔，邀約食飯傾偈。達仔話，今次係周一嶽首次直接同自己聯絡約飯局，真係受寵若驚。
達仔冇猜測周一嶽為乜搵佢，但覺得局長既然咁有誠意，加上覺得佢唔會發爛渣，為人又大方，當然會答應赴約。
為推政策鋪路
八方就覺得，周一嶽梗係為自己鋪路，事關佢哋個局，未來重有中央屠宰、食物安全、反吸煙同醫療融資等好多爭議嘅政策要推出，而呢幾項政策，民建聯未必會支持，民主黨反而傾向政府嗰邊。
周一嶽今次可算係打好個底，先同達仔私下溝通，又或者話明，煲呔意見唔代表本人立場，希望民主黨大人有大量，唔好搞亂檔等等。繼周局長後，一眾局長恐怕稍後都會出招，同民主派食飯修好關係，民主派都係留定個肚食多幾餐好啲。
傳真︰2623-9278
電郵︰[email protected]