香港真係冇晒靚仔咩？05個個走晒去鍾意單眼皮韓仔，最近班韓星更大玩爛撻自我毀容Look，Fans一樣冧爆。《該死的愛情》血流披面嘅阿Rain、《野獸》中蓄鬍頹廢權相佑、重有今日矚目襲港《颱風》裏面嗰個不修邊幅紋身海盜張東健，個個樣有咁爛得咁爛，唔見血唔甘心。張東健舊年做埋《時代》雜誌封面人物威盡，《颱風》更創下韓國電影多個第一：製作費最高、開畫最高票房、最多入場人次、就連戲服作慈善拍賣嘅價都係創新高……06新趨勢，偶像愈醜Fans愈Buy，Cool、型、內涵贏晒！
記者：陸伊琳
攝影：陳陶鈞
今年韓國型男醜得起
自貼6千蚊做臨記
《朋友》最佳導演郭璟澤嶄新力作《颱風》今日上畫，套戲耗資150億韓圜製作，是韓國史上製作費最高嘅電影。其中一幕槍戰，張東健Call來500多名Fans飾演「路人甲」，我哋香港亦有十多名Fans專程飛去做臨記，連埋食宿、機票，每位自資6千多元左右，落到場限制多多，唔准發癲、唔准影相……但有份去嘅Ada、Pauline、Anne、Joey等都話要是再有下次，一定再去！
Ada回味地說：「拍就拍一日，好曬，好辛苦，後來夜晚嘅答謝宴，張東健親身嚟答謝歌迷，真係咩都補番晒。」Anne補充：「喺實地見到張東健演得咁投入，好專業，見到佢嘅另一面，賺番晒。」另一FansMonica：「我哋唔係十八廿二，用嘅係自己錢，屋企人都好支持，去追星咪當旅行Relax啦。」Joey笑說：「我間公司全村人都知啦，每次老闆都好疏爽批假，重叫我玩得開心啲㖭。」
《颱風》今日吹襲香港
有《無極》打底，大家對主角張東健有了認識，今次貫徹《無極》賤民身份，以滿面疤痕嘅海盜再試Fans底線。故事發生在2004年7月某天，一名來自北韓嘅海盜Sin（張東健飾）登上一艘美國貨船，並偷取了船內嘅核彈操控衞星導航系統，由於事件極之敏感，美國當局未能直接捉拿呢個海盜，於是便促請南韓代為處理這事，而國軍軍官姜世宗（李政宰飾）便奉命追捕Sin，在過程中，他得知Sin嘅可憐身世，其實Sin所做的一切都為報仇，要向南北韓展開恐怖襲擊……兩位主角戲中亦敵亦友之情，正是全套戲最引人入勝之處！
訪問張東健
新年願望個個愛「打風」
記：拍《颱風》有咩趣事同難度？
張：《颱風》係一部講南北韓背景嘅電影，題材好嚴肅，製作龐大，我哋走訪到泰國和俄羅斯等多個地方取景，拍攝上雖然辛苦，但過程好好玩，每天樂在其中。
記：《颱風》和《無極》之間有甚麼共通點同感想，之間又有甚麼分別？
張：兩部都係超級大製作，所用人力物力好多，好有Teamwork，同導演及工作人員都合作得好愉快。
最Buy邊個Look
Fans入貨點：
限量品入手
加入影友會，因是官方認可，好多限量版嘅精品都搭到路買到，重有定時活動及紀念品，最重要係你可以留言畀偶像，而張東健係會覆㗎！
張東健國際影友會
網址：www.adonisifc.com
韓劇電影DVD最快最平
VISUAL-LAB
地址：旺角奶路臣街6E德發商場地庫8號舖
電話：27814563
