舊文華酒店關門大修，拆去房間露台，外用玻璃幕牆包實，美感盡失，客人與情人站在文華酒店露台望維多利亞海港黃昏美景嘅浪漫場面，以後永遠消失。香港好多舊物拆卸重建或內部重新裝潢，唔知點解，改親就冇晒味道，係我哋老咗懷念舊物吖，還是二十一世紀建築物我哋睇唔慣呢？好彩半島酒店重有個嘉道理家族睇住，能保持舊貌，你話半島都變成玻璃幕牆，眼冤咯。
睇吳靄儀嘅「明報專欄」（一月二日）講文華酒店情懷，先知道吳小姐在港大讀書時已經有錢到去文華酒店咖啡室嘆咖啡，記得佢以前亦寫過與港大同學到希爾頓（現長江中心）酒店嘅「嚤囉街」飲下午茶，情趣一流。六十年代嘅港大學生平均真係有錢啲嘅，中大學生就窮過鬼，舊年雍雅山房賣咗，會起樓，左丁山問過唔少六七十年代崇基生，「讀書時上過雍雅山房睇電影明星未？」個個都話當年窮到燶冇錢去雍雅山房飲茶；只有敏儀姐與公關大姐大久唔久就上去飲茶，觀賞遼闊馬鞍山海面，佢哋由嗰陣開始就一路享福到現在。
當年行過文華酒店都唔敢望入面嘅左丁山後來成為ClipperLounge常客，將來嗰處唔知會變成乜嘢模樣呢？不過人愈大，愈求實際，過年前投資R來電：「有一單大生意傾，務必出嚟見吓面。」以前不假思索，就會去ClipperLounge，但投資R話嗰度有九成機會碰到中環熟人，不如去「四季」，左丁山嫌「四季」遠，於是約咗去一間下午時份，十分清靜，包唔會碰到熟人嘅一間骨子乾淨茶餐廳，就在「萬邦行」。投資R帶埋一位老友嚟，三個人飲茶食三文治唔使一百蚊。諗落用六十八蚊飲一杯汽水，究竟有何快感？有時候，都要諗吓物有所值呢個問題。陶傑曾感嘆中環高級酒店情懷不再，茶餐廳文化流行，左丁山以為理由之一係酒店收費太貴想食人隻車，以香港租金之貴，餐飲收費賺七成毛利，可以理解，但賺到九成幾，當嗰個人客係賭王咩。