香港電台嘅十大中文金曲頒獎禮每年都會頒發最高榮譽嘅金針獎，舊年由汪明荃（阿姐）奪得。噚日阿姐就到港台宣布今年嘅得獎者，就係呢幾年同好多歌手包括葉麗儀同蓋鳴暉合作過嘅香港中樂團，樂團嘅藝術總監閻惠昌重上台代表樂團發言。
講起香港中樂團，阿姐就讚不絕口：「佢哋係實至名歸，中樂團真係對樂壇有好大貢獻，好多歌手都同佢哋合作過，覺得佢哋係弘揚現代音樂。」不過馮仁昭覺得樂壇重有好多有份量嘅歌手未攞金針獎，好似杜麗莎、鄭少秋同葉麗儀咁，真正唱得又提攜後輩，所以唔明點解要頒畀團體，唔知下年係咪輪到香港管弦樂團呢？
不屑玩緋聞男女
有記者問頒獎禮嘅製作統籌周國豐搵邊個做頒獎嘉賓，佢話：「郭晉安同alive就應承咗，周迅都好大機會到。其實梁榮忠喺未發生事前，我哋都諗過搵佢，但我同克勤傾過，𠵱家搵佢唔知會唔會變害佢。」
問到怕唔怕賽果會令某啲歌手黑面，周國豐話：「我哋唔係開party，總會有人冇獎，而且我哋冇加獎，反而減獎。我哋亦唔會玩緋聞，總之緋聞男女唔會互相頒獎，我覺得𠵱家已經唔興，又會令歌手尷尬。」