食環處：$9歎半磅三文魚

三人行，蒲MK，行完街睇完戲打完機唱完K，跟住問題嚟嘞，去邊度醫肚好呢？貴夾唔飽嘅餐廳Afford唔起，又唔想捱$10碗雲吞麵，咁不如試吓以下推介抵食套餐，$168Fusion菜食勻頭盤主菜餐湯連甜品，唔夠喉整多碟$9半磅三文魚，加埋一圍起每人$70有找，對得住荷包又對得住個肚，諗得過。

記者：羅灝汶　
攝影：何家亮　
模特兒：Crystal、Va、K（Salvador）

店舖隱蔽地方企理

或者你同我都有類似經驗，蒲MK搵食，食肆太多就反而唔懂選擇，屈埋喺女人街嘅細舖仔就更加無信心入，講明呀，「水道橋創作料理」就正正係呢亭格局，舖位細細比較難搵，不過一步入店內就立即有種豁然開朗嘅感覺，可能因為有上下兩層同裝修光猛喇，老闆莫先生話：「呢間係分店，同兆萬中心對面嘅正店一樣主攻日式創作料理及Fusion菜，不過正店價錢定位中上價，而分店就主攻年輕人市場，定期會推出優惠，遲啲重會搞埋積分智能卡，客人可以儲分，食得愈多就慳得愈多喇……（下刪N億字）」老闆口才一流，好似講緊廣告對白咁款。

套餐多選擇

定期推出優惠咁巴閉？咁有幾優惠先？$168「水道橋沙律套餐」有齊水道橋沙律、創作Pizza、鐵板料理、一品料理、關西箱押卷物、食事、甜品及飲品共8大系列食物，老闆依舊賣花讚花香：「Order個餐，差唔多可以試盡全店精髓。」老闆之言略嫌浮誇，講真精唔精髓就任噏嘅啫，不過食物可自由配搭就應該一讚，一品料理系列有沙律風煎餃子、稻荷炸豆腐、竹筒免治雞肉、海膽豆腐燒賣、沖繩海鹽三文魚餃、雞軟骨2串、南瓜天婦羅4件及番薯天婦羅4件任擇，無話個餐Set死乜就食乜咁無癮，同埋計番條數就確實抵，凡幫襯套餐可以$9超優惠價歎番半磅三文魚刺身，加埋一唔使$200落樓，三人均除唔使$70，重想點？

■隱蔽店舖光猛寬敞，有廂房8個總共96個座位，斷估繁忙時間都唔使點等位。

$168套餐食啲乜

a.水道橋雜菜沙律
人有我有應份有的頭盤，特色老實就無乜㗎嘞，不過勝在蔬菜夠新鮮爽脆，開胃之選咁喇。

b.明太子Pizza
店內最受歡迎的食品，口感似印度式酥餅，配合明太子作餡料，食落非常鬆化，記得趁熱食呀。

c.鐵板精力炒一口牛
賣相普通但味道一流，上碟時香氣四溢，高熱鐵板內的牛肉粒吱吱發響，入口牛味比想像中豐富。

d.彩之箱押
廚師用細膩刀功切出蘿蔔片，將新鮮三文魚及藍鰭吞拿魚緊緊包好，壽司用牛油果做餡，一啖有多層口感。

e.豆乳鍋
全白色的豆乳湯，非常清甜，內有大量雜菜、冬菇等等材料，非常適合為食又怕肥嘅女生。

f.海膽豆腐燒賣
味道主要由鮮甜海膽帶出，燒賣內餡全是豆腐，同平常豬肉餡燒賣口感完全唔同，感覺非常清新。

g.竹筒黑蜜葛絲‧焦糖布甸
一個字甜，不過甜而不漏，算有誠意喇，甜品無話要你捱食到厭的甚麼雪糕。