每年1月美國智囊機構傳統基金會都會在港公布世界最自由經濟排名榜。點解一間美國智囊偏偏要千里迢迢來港公布排名？因為香港年年考第一，人家咪要來港好好恭賀一番。其實香港已經連續12年獲得呢個殊榮。傳統基金會推呢個排名，最終目的係要向美國政府施加壓力，一方面改革美國本土政策，另一方面就要對症下藥去打開落後國家嘅經濟封鎖。對香港嚟講，其實只不過叫做有多個好消息幫手沖喜吓，排名其實象徵意義大過一切。
開頭幾年利世民同啲高官一樣，對呢個「第一」都有啲與有榮焉嘅感覺，而且每年都會擔心究竟下一年香港會唔會失去呢個殊榮。直至到有一年，利世民有機會同負責編制排名嘅研究員傾偈，先至知道其實唔使擔心太多，因為如果香港唔係「第一」，咁新加坡就會係「第一」。對美國人嚟講，新加坡始終比香港差幾皮，而且李光耀嘅大名佢哋一聽就怕怕。要畀新加坡做第一，咁咪等於要佢哋叫美國政府學新加坡？NoWay！
塞爾特之虎勢兇夾狼
利世民已經睇化咗，亦都唔怕香港會有朝一日失去「第一」榮耀。世界要有競爭先至有進步。如果香港唔再係世界最自由經濟體系，咁只不過代表有人做得好過我哋，應該戥人家高興先啱。近年傳統基金會排名之中有兩個明日之星大家要留意留意，一個叫做愛莎尼亞，一個叫做愛爾蘭。
愛莎尼亞係世界上第一個推行單一稅率制（FlatTax）嘅國家，而且自從2000年開始，企業只要將所賺嘅錢再投資，就唔使交利得稅，到真正將盈餘袋入袋先要交稅。結果，愛莎尼亞成為歐洲最高增長地方，而且係東歐嘅資訊科技重鎮。大家唔好忘記，愛莎尼亞係1991年先由前蘇聯分裂出來，至今只不過短短15年。
愛爾蘭嘅稅率亦低到無人有，成個90年代平均利得稅只係12.5%，連自詡奉行低稅率嘅香港都自愧不如。80年代愛爾蘭係西歐最窮嘅國家，唔夠20年已經變成全歐洲第三富有，而且𠵱家仍然係最高增長嘅國家。今日愛爾蘭稱塞爾特之虎(CelticTiger)，同亞洲四小龍爭一日之長短。
話說每年傳統基金會公布排名之前都有一個早餐會。今年個早餐會上所有人都告誡︰「香港千祈唔好加稅。」歐洲二愛嘅成功，專家認為秘訣得3隻字︰「低稅率」，希望唐英年會學到嘢。
利世民