港大果然快手，剛踏入06年就馬上發表今年嘅宏觀經濟預測，首席副校長兼亞太經濟合作研究中心主任王于漸（圖）雖則係主禮嘉賓，但噚日喺發布會上就齋坐無發言，但喺會後同傳媒傾偈時就一發不可收拾，講到停唔到口，由世貿韓農事件，到美國同古巴恩怨，以至菲律賓點解會腐敗……王教授的確見識豐富，但華華就聽到頭都暈埋！
講完環球政治，王教授再講香港稅制，佢話反對擴闊稅基，反對徵銷售稅，最好就係積極不干預，事關過去150年來，港人都係自己幫自己。
華華問佢，成日都做咁多經濟預測，準繩度有幾高呢？王教授笑笑口話，預測嘅嘢，時間愈短就愈準，咁日日都有新嘅事情發生，最好就梗係留意埋即時資訊啦！唔知大家收唔收到呢？