唔經唔覺又一年，Wyman已經出到第二部時裝文字集《潮騷》。
同樣結集自《Milk》專欄。咪嫌我老套，摷番本舊作比較一下，你睇花生騷都會睇吓阿邊個今季有無跌Watt啦！舊作燙金封面，賣$120；今次白色絲絨，雖然好黐烏糟，但賣$98，定價合理。
作為長期讀者，發覺Y先生寫作態度頗見分別，寫前作時Wyman填詞是翹楚，寫Fashion卻是由零寫起，因此時而自嘲，寫到被搵笨，寫到點儲錢去朝聖，平民百姓讀者特別有感受；今次評評這個牌子，笑笑那牌子，記記被「哉絲」邀請去巴黎看騷，變成了Insider，沒有從前寫崇拜COMMEdesGARCONS時真摯。最好看是寫巴黎，尖酸刻薄，好看得來，好彩又未至於係純粹娛樂。
Wyman說最好笑是十年前被笑是「品味最差人士」，05年卻獲十大最佳衣着，其實自己根本無變！他沒理由不明白，人往往不是因為穿了甚麼而被尊重，而是因為做了甚麼。去巴黎睇騷、獲衣着獎，其實都係寫作獎。你重話自己最憎寫字？
記者：何兆彬
售賣點：書店及各大時裝店有售
（包括PageOne、HMV、Basheer等等）