煲呔話今年唔搞政改，自然會搞多啲經濟嘅嘢。搞經濟，會唔會令打工仔受惠呢？兩位勞工界代表就各有不同見解。
勞聯李鳳英明顯係樂觀派，雖然好多人都話，由策發會傾最低工資、最高工時，肯定係拖字訣，傾唔埋冷居多，但英姐依然充滿希望，唔敢講實一定冇，反而叫八方積極啲睇，希望今年年底都為打工仔帶嚟喜訊。
工聯會鄺志堅就悲觀啲喇，問佢今年有冇機會推得成最低工資，佢就話唔知呀，真係冇乜展望，好似對煲呔政府唔太信任喎。佢重提醒煲呔，打工仔好實際，你做得好，梗係拍手，做得唔好，一樣照噓，叫煲呔唔好忽視打工仔心聲喎。
政改方案夭折收場，作為立法會議員，鄺大狀覺得今年應該算清閒年，但預計煲呔唔會同佢行得太埋。咁又係，煲呔鍾意玩鋪鋪清，又點會賣帳畀各大政黨吖。
傳真︰2623-9278
電郵︰[email protected]