45條關注組正密鑼緊鼓組黨，八方聽講喺法律界聲望極高嘅張健利都正式應承加入，真係為佢哋注入強心針。至於陳太，聽講佢不在一百名邀請加入人士之列。
一路都有消息話，係張健利請陳太上街，八方都覺得機會好高，因為張健利一向對民主同自由都十分堅持，每次法律界遊行都見到佢，佢喺港英時代已經好受重用，屬於德高望重人物。
為咗組黨，四大狀呢個聖誕都冇假放，八方問佢哋係唔係忙於搵會址？佢哋話唔係，反而係要先度掂個開支預算，然後開始籌款；咁又係，呢個世界冇錢不行嘛。當然大狀唔係窮人，不過，個黨唔可能由佢哋自己包起，一定要有市民支持，籌款就係一個好好嘅方式。
之不過，組黨要員之一Ronny湯忙極之餘，都接受電台訪問。今晚八點商業電台《有誰共鳴》節目，就會播出Ronny嘅訪問，期間Ronny除咗分享聽音樂嘅心得，亦會講吓喺英國讀書時嘅窮困生活，全靠林子祥一曲「分分鐘需要你」支撐住，令佢同太太帶嚟好多甜蜜嘅回憶。有興趣者不妨聽聽。
傳真︰2623-9278
電郵︰[email protected]