美股隔晚高收，日股假後高開，港股自然風騷。本港窩輪炒家以炒C輪為主，好耐冇試過昨日咁興奮，升幅超過6成嘅C輪，竟然超過50隻。
恒指去年8月最高15508，昨收15200，相差308點。再升308點上次去年高位，甚至破高位，機會唔細。喺窩輪市場贏開錢嘅，有本錢喺手，繼續炒落去無妨，但最好注碼開始收細。冇贏錢嘅，𠵱家先至入市，則要諗過先，或者候回吐之時先至入市買貨。
中電信C輪9796：國內發3G牌，事在必行，睇吓係上半年發抑或下半年發，中電信（728）好大機會攞到1個。中電信近日慢慢爬升，昨升2格。
睇位買C輪，揀9796。隻輪今年9月初夠鐘，輪價37.5仙，溢價5.1%，槓桿率7.8倍（有效5.3倍），引伸波幅28.1%。想賭大啲（即係贏輸都勁啲），則揀9087，隻輪下月13日最後買賣，槓桿率大好多。
中移動C輪9932：大市要創新高，中移動（941）必成主角之一。候低位買C輪，9932啱睇。隻輪今年5月尾到期，輪價43仙，溢價5.6%，槓桿率8.9倍（有效5.8倍），引伸波幅33.6%。炒短期輪，贏輸大啲，向9382埋手。
章盛