《射鵰英雄傳》、《書劍恩仇錄》、《笑傲江湖》同《鹿鼎記》，全部都係查大俠金庸傾力之作。畫咗小說插圖四十年嘅董培新得到查大俠同意，將查大俠所寫小說嘅情節畫成四十幅畫，好似《鹿鼎記》主角韋小寶同六美女同床，《射鵰英雄傳》入面嘅華山論劍，同埋《天龍八部》敍賢莊血戰前夕等等，幅幅都繪形繪聲，幅幅都維肖維妙。
久未露面嘅查大俠當然畀面董培新，噚日出席畫展開幕禮。大俠同八方講，張張畫都好鍾意，直情想攞返屋企作擺設嗰隻。但係如果讀者真係想買幅畫返屋企，其實都唔平，每張售價由兩萬二至三十六萬不等。市民有興趣睇畫嘅話，不妨去中環交易廣場一期精藝軒畫廊欣賞吓，話唔定會撞到查大俠，攞個簽名或者合照都好啦。
傳真︰2623-9278
電郵︰[email protected]