肥陳陳鎮源果然努力，上任第二日就即刻約埋八個房委會委員，參觀快將出售嘅居屋，包括牛池灣嘉峰臺、沙田愉翠苑同油塘油美苑。唔知係唔係為迎接署長大駕光臨，早前牆身出現裂紋嘅油美苑全部執到靚一靚，一條裂紋都冇。
有委員同八方講，牛池灣嘉峰臺廁所早前被傳媒話太細，孕婦同肥仔都好難喺廁所轉身，令房委會都好難堪。超過二百磅嘅肥陳為打破廁所太細言論，鼓起勇氣走入廁所行一轉，佢話廁所其實唔細，自己喺裏面都好鬆動喎。咁又係，一分錢一分貨，居屋價只係約一百萬一間，但私樓動輒要兩、三百萬，居屋廁所細啲都預咗啦。
傳真︰2623-9278
電郵︰[email protected]