市場氣氛好轉，新股上市不斷，咁專湊IPO個啲財經顧問企業傳訊應該好好景。不過，世事無絕對，繼舊年9月iPRAsia賣咗大部份股權畀國際公關公司奧美之後，另一家在本地財經公關行頭薄有名氣的溢星（Jovian），剛剛以2630萬賣咗畀烽火傳媒（2362，即係以前個間金澤超份子）。
有口痕友話，溢星個靚老闆Angela楊𠵱家賣盤，唔通睇唔好前景？其實呢行今時唔同往日，就算幾巨型的IPO都好，爭餐死之餘兼無乜肉食，重要成日俾啲客同埋記者「抦」，總之就係搵食艱難。睇番溢星條數，03年蝕22萬元；04年賺41.8萬元；05年保證賺到400萬元，即係以6倍多市盈率賣盤。
烽火傳媒買咗溢星後會點搞？查實烽火傳媒只係舊年10月易手畀日本仔，班㗎仔講明係要在亞洲地區（日本除外）搞廣告、傳訊、科技同媒體云云，今次收購，佢哋認為係公司涉足財經及企業傳訊的「絕佳」機會，同埋可以同集團積極開展緊的綜合媒體內容、廣告同電訊增值服務業務產生協同效應……大家不妨睇睇㗎仔有乜本事。
李華華