新年吹雞：20分鐘撻花堵牆Easy執

迷彩牆？咪癲啦！但其實又Shot唔晒，潮流興於家居重點化其中一堵牆，往往會撞一隻獨特的色彩牆，而迷彩未必唔Work，問題係師傅級都未必髹得出箇中神髓。距離農曆狗年又唔到一個月，牆壁發霉、漆油剝落……點樣可以Easy執？查實自家翻新一啲都唔難，其中一招用海綿撻花牆身，同時遮醜兼有迷彩牆異曲同工之效。快手嘅話，一堵細牆20分鐘搞掂！

記者：陳偉林攝影：伍慶泉、陳偉林ImageGirl：Irene
鳴謝：E&CInteriorDesignCo.（27559755）

脫膝、原子筆痕、剝落……九萬幾樣小瑕疵，索性髹過佢。但嫌悶又或懶得鏟灰，變臉是最「一石萬鳥」的方法。只需利用天然海綿及乳膠漆添加劑，便可如做勞作般把油一笪笪上色做出效果。重點化只撻花一堵牆又得，撻晒全屋此Pattern亦唔浮誇，輕易便把瑕疵遮蓋兼替居室換新Look。

1.依原本牆色先髹一浸作底色。待乾後用海綿沾上乳膠漆添加劑，輕力印上牆上。一般來說，乳膠漆添加劑可混入乳膠漆中或單獨使用，延緩漆油乾燥時間，方便做出不同視覺效果。

2.牆身不算太殘又或懶人一族，不補髹底色，直接撻上花紋亦可，咁就半個鐘唔使就可撻好一堵牆。印海綿時要順同一方向，保持固定形狀及大小。想有較密效果，撻完一層後，可再撻多層。

日子久了，牆身容易出現裂痕，若然裂痕較深的話，宜先以白英泥填補罅隙。

■可先於裂縫填入白英泥，待乾後用灰匙將牆之寶鋪面。最後用幼沙紙磨平才髹上防潮底油及乳膠漆。

香港地天氣較潮濕，日子耐咗牆身及天花容易出現霉點發黃，又或者乳膠漆面出現剝落的問題。

1.用批匙將霉點及剝落的乳膠漆鏟走。

3.待乾透後用細號的幼砂紙將表面磨平。用排掃先髹上一層防潮底油再髹上乳膠漆。

乾淨平滑而堅固的牆身表面，對上漆工序可謂事半功倍，故開始髹油前不妨以清水洗滌好牆身，又或者需要用牆之寶修補凹凸不平的表面，待處理好後才髹上防潮油打底。上漆時，可先髹上一至兩層的底油以遮蓋原身瑕疵多多的表面，繼而才髹上主色，效果將更出色。髹油得宜也能令牆色更襟，減少脫落、脫色等問題。

1.處理好牆身之後，可先漆上一層防潮油。另加一至兩層的底油，可令牆身變得平滑富光澤。

2.最後才髹上主色，相信效果會更持久理想。

牆紙用耐咗，好容易出現局部發黃的問題，唔想成幅更換又或者搵唔番原有花紋或圖案，原來漂白水亦可漂去黃迹，但此法只適宜膠面的牆紙上使用。

■以乾布沾上漂白水，在發黃的牆紙周圍不斷揩抹，甚至將沾有漂白水的布條，貼在發黃較嚴重的位置待上三小時左右，有望將牆紙回復如昔。

牆紙邊剝開是最普遍的問題，但亦是最易解決。到五金舖買牆紙粉開水至糊狀，甚或直接以白膠漿重新黏貼便可。

1.先撬開牆紙多些，待清潔好牆身底部，用漆掃沾上白膠漿塗在剝落處。

2.以批匙將要修復的牆紙壓平，多出的膠漿可以用濕布揩抹掉，待乾便成。

市面較普遍的牆紙分有紙質底、膠面紙底同膠面布底等多款，以最後者較為耐用兼且可以清水洗滌，而牆紙均以卷裝為售賣單位，每卷面積約5.3平方米，若要度家居所需的牆紙面積，最好預留多一成方便剪裁嘛！款式方面，牆紙花紋已夠繽紛，但講今期流行，則選紙面較細緻的圖案。

1.用灰匙將牆身修補好，再以幼砂紙磨至平滑。並度好牆身尺寸，預算好所需的牆紙數量。然後在牆身同牆紙背面塗上牆紙膠，以便黏合。

2.對齊好牆紙花紋，以膠刮盪平牆紙，並擠出多餘的膠漿。

翻新時可考慮選定目標牆身大修重新上油，其餘只稍作執漏，除了省工夫外，「孤立」一堵牆亦是最潮最出色的做法。一般可選飯桌前的牆、或電視後的牆。想這堵牆玩得更出色，家陣重興玩自家顏色㖭！好似日本漆就設有夢幻千色配色店，客人可以專用調色機調出自家喜歡的油漆色澤，難得一般普通調色不另額外收費，一公升油$78，五公升油$365，而特別調色一公升油$78-$85，五公升油$365-$380。自家色之外，坊間重有好多特色油漆，好色嘅你不妨初步睇睇有冇心水。

■三合一抗菌乳膠漆，除防水及可直接清洗，方便刷去筆痕及污迹外，還可覆蓋各類纖細裂痕，上髹同時執漏，掂。$73/L

■立邦第二代內牆漆重勁，功能包括防水、耐擦洗，覆蓋細裂紋、防霉及獨特清新氣味。備半光面或啞光面色調。$78/L

■藝秞油漆添加劑，以兩份普通油加一份添加劑的比例，便可髹出條子效果的牆身。$68/500ml

■新出的滾塗石漆，可塑造出如圖中恍如石面的質感同花紋，但工序較繁複，需先髹底油、面油再加保護漆。約$10/呎