新年收到一位西雅圖華盛頓大學教授嘅電郵，祝願新年快樂。呢位教授Ｌ教數碼新聞（digitalnews），自己當然經常上網，教授Ｌ傳來一則內地順口溜，祝左丁山喺二○○六年：
運氣像曾慶一樣紅，
做人像吳官一樣正，
家庭像賈春一樣旺，
生活像溫家一樣「飽」，
事業像小羅一樣幹，
戀愛像李長一樣春，
打牌像錦濤一樣胡。
左丁山睇完，嘻哈大笑，視之為去年今年收到嘅聖誕卡、新年卡。無論係電郵或印刷品，以Ｌ教授呢份最正、最鍾意。左丁山自五年前開始，已不再寄出賀卡，一切盡在不言中，望各方朋友包涵。
可惜一月一日早上冇開電腦，否則睇完會沾上一啲賈春一樣旺嘅旺氣，到馬場買中唐英年、馮載祥三隻馬「心福」、「哈哈霸」、「富士晨曦」，自己收錢會收到曾慶一樣紅。
做完善事先至返屋企睇電郵，睇完突然諗起唐司長喺元旦賽馬旺得咁交關，不如沾吓佢嘅旺氣，當晚蘇格蘭超級足球聯賽有榜首雙雄大戰，就係赫斯大戰些路迪。些路迪件球衣與財爺嘅綵衣一樣顏色，就係綠白間，於是下定決心，拎起電話打一八八五：「赫斯對些路迪，客勝！」注碼無謂講，如果些路迪輸咗，戶口會剩番十蚊。
因球賽冇直播，沖完涼睇BBC網站，話赫斯領先二比零，大歎一聲運滯，上床睡覺去也。點知第二朝十點幾起身，睇有線新聞，些路迪居然在最後兩分鐘反敗為勝，日本國腳中村俊輔似足碧咸，兩個罰球傳中，都交落隊員個頭，一頂就入！世事有咁神奇，發夢估唔到，贏波當然補唔番輸馬，但有此運氣，都叫做○六年唔會衰得晒！